كيف يمكن تجهيز غرفة طفل مصاب بمرض التوحد

البيئة المحيطة بكل اشكالها السمعية والبصرية مؤثرة بشكل مباشر على اجسامنا ونفسياتنا، وعلى نفس القياس الطفل المصاب بمرض التوحد عنده حساسية اكتر من الشخص العادي تجاه المؤثرات المختلفة عليه، لأنه يفتقد لتصفية الأصوات والاضواء وحتى كمان الروائح وبتوصل مضاعفة عشرات المرات، واللي بيسبب له اضطراب السلوك وتشتيت الانتباه، ودورنا هنا نحاول نقلل الضغط عليه عشان يكون سهل عليه يندمج في المجتمع

تجهيز غرفة طفل مصاب بمرض التوحد

تلت الأطفال المصابين بمرض التوحد تقريبا عندهم مشاكل في الاتصال مع الاخرين، وأثبتت الدراسات المختلفة أن الأسلوب
البديل والأكتر راحة ليهم هو عن طريق الصور والاشكال في التواصل والتعلم وتبادل الأفكار، ومهم جداً نبدأ بغرفته
الشخصية كأول مكان في البيت، عشان تتأكدي من سلامة غرفة طفلك وقد ايه مناسبة لحالة التوحد الخاصة بيه، هننصح ببعض إرشادات مهمة واساسية عشان تحمي طفلك من أي عوامل خارجية ممكن تأذيه او تقلل من استجابته وتشتت انتباهه.

  1. استخدمي دايما الأشكال البسيطة والواضحة في الغرفة، ابعدي عن الزخارف والاشكال المعقدة والصور المليانة شخصيات بتفاصيل كتير .
  2. الترتيب وفصل كل جزء من الغرفة في الوان مختلفة هيفرق مع الطفل انه يستوعب ان لكل مكان مهمة او
    وظيفة مختلفة .
  3. اختاري الالون الصريحة الأساسية او الباستيل الهادية وابعدي عن الألوان الفاقعة عشان تخفف من توتر الطفل .
  4. مهم تختاري غرفة الطفل تكون اهدى مكان في البيت ومش مطلة على شارع رئيسي او فيها شرفة .
  5. زودي من قطع القماش والسجاد والمخدات قدر الإمكان عشان تمتص الأصوات .
  6. توزيع الإضاءة بشكل هادئ ومتساوي ونبعد عن الأضواء الساطعة والسبوتات بالانعكاس العالي .
  7. كمان نقدر نتحكم في اضاءة الشمس من النافذة عن طريق الستاير بأنواعها المختلفة، سواء القماش او الش رائح.
  8. الأفضل يكون الأثاث ثابت وكل حاجة دايما في مكانها من غير تغيير.
  9. الطفل المصاب بالتوحد معرض أنه يصاب بنوبة غضب او صرع، بالتالي ضروري تكون غرفة الطفل امنة من غير عناصر قابلة للكسر او ممكن تؤذي الطفل، لان تحركه في حالة النوبة بيكون بغير وعي او ادراك، فنتأكد من تثبيت الأثاث في الحائط، ونحميه من أي طرف مدبب موجود داخل الغرفة. وكمان وضع الصور على أجزاء الغرفة المختلفة، مثلاً
  10. استخدام صورة قميص على الدولاب، ممكن يساعد الطفل على فهم وظيفة الصندوق ده ويسهل التعامل معاه، وكذلك باقي أجزاء ومهام الغرفة .
  11. العناصر الطبيعية تعتبر مصدر مريح لطفل التوحد، لو في الإمكان حاولي تخصيص مساحة زراعة حتى لو خارج الغرفة،
  12. ولو في حديقة تابعة للبيت هيكون افضل، ومن العناصر الفعالة جداً داخل غرفة الطفل هي “مساحة الهروب”، وهي اشبه بمكان منعزل داخل الغرفة يهرب ليها الطفل لو حس بأي اضطراب او نوبة او تشتت انتباه، المساحة ممكن تتمثل في خيمة أطفال تحتوي مخدات وبطانية ويمكن سماعة لتقليل أي صوت مزعج بالنسبة له، ومهم تكون معتمه للضوء كمان.
  13. المحافظة على ترتيب غرفة الطفل وحفظ الأدوات والكتب والألعاب بشكل دائم في الرفوف بعيد عن عين الاطفال، بيقلل من الفوضى في البيئة المحيطة بيهم وبيخليهم اكتر امان.
  14. المصممين الداخليين بينصحوا باستخدام الموكيت او الفينيل في الارضيات، واستخدام الاسفنج على الحائط في حالة ان الطفل ضرب راسه بالحائط أثناء نوبة الغضب، مع اختيار أبواب تفتح بالسحب او الجر بدل الأبواب العادية.
  15. كمان يفضل يكون جزء من الباب زجاجي لمراقبة الطفل، وهيكون افضل استخدام كاميرا مراقبة ومتابعته على مدار اليوم.
  16. المساحات الواسعة اريح نسبيا للطفل المصاب بمرض التوحد، لكن المساحة الأصغر هتكون تحت السيطرة بشكل أكبر.
  17. نحاول قدر الإمكان تجنب آلة التهوية ذات الصوت، المراوح او تك ييف الشباك، أحيانا بتكون مصدر ازعاج للشخص العادي، واكيد الاضعاف لطفل التوحد، نقدر نستبدلها بالسبيليت او المركزي.
  18. اختاري اثاث بعيد عن الكلاسيكية بألوانها المدهبة وزخارفها المتعددة، لان الهدف الرئيسي للمصمم الداخلي في الغرفة هو الوصول لشكل يجمع وظائف كافة الحواس بشكل مفيد مع ربط الفراغ بين الوظائف البصرية والتفاعلية، والحفاظ على المسببات لنوبات المصابين بمرض التوحد .
  19. وتعتبر الرياضة والتمارين البدنية، من العلاجات الفعالة في تنشيط القدرة الحركية عند أطفال التوحد، وكمان بتساعدهم على تخفيف التوتر ونوبات الغضب والعدوانية والاكتئاب، وبتنمي مهارات التواصل الاجتماعي، وحتى كمان بيأثر على فرط الحركة ويقلل منها، بالتالي هيكون من المفيد توفير أدوات بسيطة ومساحة للرياضة الامنة حتى لو خارج غرفة الطفل.

وفي النهاية، مش شرط تلتزمي كأم بكل التدابير السابقة بالحرف، لأن بعضها مكلف، ممكن يتوفر للباقي حلول اقتصادية وممكن للبعض لا، لكن خليكي متأكدة أن سعيك في تطوير بيئة طفلك هيساعده يتقبل التواصل، وهتبذلي معاه مجهود اقل في التعليم، وتتحول حالته لمشكلة بسيطة سهل التعامل معاها .

Komentarze
جار التحميل...